Myfyrwyr PCYDDS yn cystadlu yn rowndiau terfynol WorldSkills UK
Bydd chwech o fyfyrwyr Prifysgol Cymru Y Drindod Dewi Sant (PCYDDS) yn cystadlu yn rowndiau terfynol cenedlaethol WorldSkills UK yr wythnos hon.
Bydd dros 50 o rowndiau terfynol, gan ddechrau yfory (14 Tachwedd), yn cael eu cynnal mewn naw lleoliad ym Manceinion gyda 500 o gystadleuwyr o bob rhan o’r DU. Cynhelir y seremoni wobrwyo ddydd Gwener 17 Tachwedd.
Bydd David Ntino yn cystadlu yn rownd derfynol Systemau Rhwydwaith, a bydd Rohan Chavan yn cystadlu yn y gystadleuaeth Seilwaith Rhwydwaith. Mae’r ddau yn fyfyrwyr y cwrs MSc mewn Seiberddiogelwch a Fforensig Digidol.
Yn ogystal, bydd pedwar Prentis Gradd yn cystadlu hefyd, sef, Oscar McNaughton, sy’n gyflogedig yn CBM Cymru, a fydd yn cystadlu yn y categori Gweithgynhyrchu Uwch, Morgan Evans sy’n cael ei gyflogi gan Safran Seats a Jacob Gibbons sy’n cael ei gyflogi gan FSG Tool and Die yn cystadlu yn y categori Melino Rhifyddol Cyfrifiadurol (CNC) a Kian Lloyd sydd hefyd yn cael ei gyflogi gan FSG Tool and Die yn cystadlu yn rownd derfynol Troi CNC.
Dywedodd Lee Pratt, Rheolwr Academi Gweithgynhyrchu a Sgiliau Uwch (AMSA): “Rydym yn hynod falch o gyflawniadau ein cystadleuwyr. Maen nhw i gyd wedi dangos penderfyniad mawr i ragori ac wedi bod yn ymroddedig ers y diwrnod cyntaf. Dymunwn y gorau iddynt ar y daith hon.”
Nod yr Academi Sgiliau Gweithgynhyrchu Uwch (AMSA) yw datblygu, cynnal ac adeiladu ar y sgiliau hanfodol sydd eu hangen ar brentisiaid gweithgynhyrchu a chyflogwyr i gyflwyno’r technolegau sy’n cadw’r diwydiant gweithgynhyrchu’n gystadleuol yn fyd-eang. Mae’r Academi’n darparu hyfforddiant gwell i fyfyrwyr Peirianneg, prentisiaid a busnesau ar yr offer peirianyddol a’r offer archwilio diweddaraf o safon y Diwydiant.
Wedi’i ariannu gan Lywodraeth Cymru a Chyngor Cyllido Addysg Uwch Cymru (CCAUC), mae AMSA yn gweithio mewn partneriaeth â thri o’r cwmnïau mwyaf blaenllaw yn y diwydiant gweithgynhyrchu: Mazak (cyflenwr offer peiriannol), Renishaw (offer mesur/arolygu) a Sandvik Coromant ( cyflenwr offer torri deunydd).
Mae’r Brifysgol yn cynnig rhychwant o Radd Brentisiaethau a Phrentisiaethau Uwch o Archaeoleg, Digidol a Pheirianneg i Gwydr Lliw. Ewch i’n gwefan i ddarganfod mwy.
Mae WorldSkills UK yn elusen annibynnol ac yn bartneriaeth rhwng cyflogwyr, addysg a llywodraethau. Gyda’i gilydd, maent yn defnyddio arfer gorau rhyngwladol i godi safonau mewn prentisiaethau ac addysg dechnegol fel bod mwy o bobl ifanc a chyflogwyr yn llwyddo.
Gwybodaeth Bellach
Eleri Beynon
Pennaeth Cyfathrebu Corfforaethol a Chysylltiadau Cyhoeddus
Cyfathrebu Corfforaethol a Chysylltiadau Cyhoeddus
E-bost: eleri.beynon@pcydds.ac.uk
Ffôn: 07968 249335