Dyfarnu Medal John Grimwade i arbenigwyr o’r Brifysgol a TWI

Dyfarnwyd Medal John Grimwade i arbenigwyr o TWI a Phrifysgol Cymru Y Drindod Dewi Sant mewn seremoni wobrwyo yng nghynhadledd Profion Anninistriol (NDT) a Monitro Cyflwr (CM) flynyddol Sefydliad Profion Anninistriol Prydain (BINDT), NDT 2023/CM 2023.

Rhoddir y wobr gan BINDT ar gyfer y papur gorau gan aelod o’r Sefydliad i ymddangos yng nghyfnodolyn y Sefydliad yn y flwyddyn flaenorol. Mae’r wobr hon, a gychwynnwyd ym 1981, yn coffáu’r diweddar E J Grimwade MC HonFInstNDT, a oedd yn unigolyn arloesol o bwys yn y byd NDT.

Aeth Peiriannydd Roboteg TWI, Ross Hanna, sy’n gweithio yng Nghanolfan Dechnoleg TWI (Cymru) ar hyn o bryd, gydag Athro NDT Cymhwysol y Drindod Dewi Sant, yr Athro Peter Charlton, i dderbyn y wobr ar eu rhan eu hunain a’u cyd-awduron, Dr Mark Sutcliffe, Ymgynghorydd Meddalwedd TWI, a Dr Stephen Mosey, Uwch Ddarlithydd y Drindod Dewi Sant yn yr Ysgol Cyfrifiadura Cymhwysol.  

Cyhoeddwyd y papur arobryn, ‘Efficient algebraic image reconstruction technique for computed tomography’, yn Insight, Cyf 64, Rhif 6, tt 326-333 ym mis Mehefin 2022.

Meddai’r Athro Peter Charlton: “Mae ein hymchwil ym maes Profion Annistrywiol (NDT) yn elwa o’r clwstwr unigryw o gwmnïau technoleg NDT sydd wedi’u lleoli yng Nghymru ac yn arbennig ein partneriaeth ddiwydiannol barhaus â Chanolfan Dechnoleg TWI (Cymru). Rydym yn arbennig o falch o dderbyn medal fawreddog John Grimwade ynghyd â’n partneriaid yn TWI am yr eildro, sy’n helpu i danlinellu natur flaengar ein gwaith ymchwil NDT cymhwysol ac sydd hefyd yn dyst i fanteision ffurfio partneriaethau diwydiannol academaidd strategol. ”

Dywedodd Dr Mark Sutcliffe hefyd, “Dim ond trwy gydweithio â sefydliadau academaidd lleol y gellir ymchwilio a datblygu dulliau Profi Annistrywiol newydd. Fel goruchwylydd PhD diwydiannol, mae wedi bod yn anrhydedd cael cydweithio ar yr ymchwil hon sydd wedi helpu i adeiladu a chryfhau gallu ac enw da TWI.”

Mae’r prosiect hwn wedi’i gynnal yn rhan o fenter o’r enw AEMRI (Sefydliad Ymchwil Peirianneg a Deunyddiau Uwch), a ariennir gan Swyddfa Cyllid Ewropeaidd Cymru (WEFO) gan ddefnyddio Cronfeydd Datblygu Rhanbarthol Ewrop (EDRF).

Mae Ysgoloriaethau Sgiliau’r Economi Wybodaeth (KESS 2 Dwyrain) yn fenter sgiliau lefel uwch ar gyfer Cymru gyfan, sy’n cael ei chefnogi gan Gronfa Gymdeithasol Ewrop drwy Lywodraeth Cymru ac yn cael ei harwain gan Fangor ar ran y sector addysg uwch yng Nghymru.

Gwybodaeth Bellach

Eleri Beynon

Pennaeth Cyfathrebu Corfforaethol a Chysylltiadau Cyhoeddus    
Cyfathrebu Corfforaethol a Chysylltiadau Cyhoeddus     
E-bost: eleri.beynon@pcydds.ac.uk  
Ffôn: 07968 249335