Addasu i Oes Heneiddio

Heddiw mae’r Ganolfan Genedlaethol ar gyfer Prifysgolion a Busnes (NCUB) yn lansio ‘Adapting to the Age of Ageing’, sef casgliad o astudiaethau achos #cydweithio sy’n dangos sut mae prifysgolion a busnesau’r DU yn cydweithio i fynd i’r afael â heriau ein poblogaeth sy’n heneiddio. Bu ymchwilwyr yng Nghanolfan Arloesi Technolegau Cynorthwyol ATiC (ATiC) Prifysgol Cymru Y Drindod Dewi Sant (PCYDDS) yn cydweithio â gwneuthurwyr ffilm o Abertawe, eHealth Digital Media Ltd, ar brosiect a oedd yn caniatáu iddynt weld y byd yn llythrennol trwy lygaid rhywun sy’n byw gyda dementia.

Roedd y prosiect arloesol Gweld Dementia Trwy Eu Llygaid: Byw gyda Dementia yn cynnwys ymchwil gan dîm ATiC dros gyfnod o ychydig dros flwyddyn i lywio cyfres o 10 ffilm newydd gan eHealth Digital Media Ltd.

Mae’r ffilmiau, am fywydau beunyddiol a heriau pobl sy’n byw gyda dementia, yn canolbwyntio ar ddarparu cefnogaeth, hyfforddiant ac addysg i gleifion dementia, eu teuluoedd, gofalwyr, a gweithwyr gofal iechyd proffesiynol.

Defnyddiodd y prosiect offer ymchwil ymddygiad dynol uwch ac UX, megis technoleg olrhain llygaid ac adnabod mynegiant wyneb, wrth greu a gwerthuso’r ffilmiau.

Gweithiodd tîm ATiC yn agos gyda Chyfarwyddwr Creadigol eHealth Digital Media, Kimberley Littlemore, y cafodd ei rhieni ddiagnosis dementia. Gosodwyd camerâu o amgylch cartref y rhieni i gadw golwg ar eu bywydau bob dydd.

Yn ogystal, defnyddiodd y cwpl sbectol tracio llygaid gwisgadwy wrth berfformio gweithgareddau cartref, fel y gallai’r tîm ‘weld y byd trwy eu llygaid.’ Roedd y ffilm hon yn helpu’r tîm i ganfod a deall unrhyw batrymau a sbardunau dros amser ac i ddewis eiliadau allweddol, y gellid ei ddadansoddi a’i drafod ymhellach gan glinigwyr ac academyddion yn y maes.

Dywedodd Tim Stokes, Cymrawd Arloesedd ATiC ac arweinydd y prosiect: “Mae’r cyfan yn swnio’n dechnegol iawn ond wrth wraidd y cyfan, yn syml mae’n ymwneud â deall pobl. Deall sut maen nhw’n rhyngweithio â’i gilydd, deall eu hanghenion, a helpu i ddatblygu’r cynhyrchion, gwasanaethau a systemau iechyd a lles gorau - gan roi pobl wrth galon yr ymchwil.

“I ddechrau, dechreuodd y prosiect hwn fel arbrawf syml a ddeilliodd o’r syniad bod Kimberley eisiau ‘gweld dementia trwy lygaid ei rhieni’ – ac yn llythrennol roeddem yn gallu ei helpu i wneud hynny trwy ddefnyddio ein sbectol olrhain llygaid. Mae wedi ein helpu ni i ddeall sut mae pobl â dementia yn byw a deall pa fathau o heriau y maent yn eu hwynebu o ddydd i ddydd.”

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071