Y Drindod Dewi Sant yn cynnal Trydedd Gynhadledd Ymchwil Gydweithredol gyda Belron®
Cynhaliodd Prifysgol Cymru Y Drindod Dewi Sant (PCYDDS) ei thrydedd gynhadledd ymchwil gydweithredol fwyaf hyd yma gyda Belron®, cwmni atgyweirio a disodli gwydr modurol mwyaf y byd.
Ar 28 Chwefror, cafodd pedwar ar hugain o uwch swyddogion gweithredol a pheirianwyr Belron®, a oedd yn cynrychioli’r Unol Daleithiau, y DU ac amryw o wledydd Ewropeaidd, daith arbennig o amgylch cyfleusterau Canolfan Ymchwil Modurol Cymru (WAGRC) Y Drindod Dewi Sant.
Yn ystod y gynhadledd, traddododd yr Athro Kelvin Donne brif ddarlith yn tynnu sylw at yr ymchwil arloesol a gynhaliwyd yn WAGRC dros y pymtheng mlynedd ddiwethaf. Wedi’i noddi gan Belron®, mae WAGRC yn gartref i gyfleuster balisteg trwyddedig ac yn cynnal ymchwil arbrofol ar sgriniau gwynt. Yn arbennig, mae’r labordy yn ymfalchïo mewn siambr darged sy’n gallu gweithredu ar dymheredd sy’n amrywio o -10°C i +50°C, gan ei gwneud yn gyfleuster unigryw yn Ewrop.
Dan reolaeth yr Athro Kelvin Donne a Jordan Jenkins, ynghyd â thîm technegol sy’n cynnwys David Cooper a Mark Fall, mae WAGRC wedi casglu data helaeth dros y 15 mlynedd ddiwethaf drwy fesur miloedd o effeithiau cerrig ar sgriniau gwynt. Mae’r data hyn yn chwarae rhan hanfodol wrth lywio ‘Gwyddoniaeth Belron®’. Defnyddir modelu cyfrifiadurol uwch i ddadansoddi digwyddiadau effaith balisteg a’r ffenomen ‘tolc i grac’ ddilynol. Mae’r gwaith efelychu wedi’i galibro yn ôl canlyniadau arbrofol a gafwyd o’r labordy balisteg, gan sicrhau cywirdeb a dibynadwyedd yng nghanfyddiadau’r ymchwil.
“Roedd Prifysgol Cymru Y Drindod Dewi Sant yn falch iawn o groesawu cynrychiolwyr o Belron® i’n campws,” meddai’r Athro Kelvin Donne. “Rydyn ni’n wirioneddol gyffrous am y gobeithion o gydweithio yn y dyfodol a’r manteision i’r ddau sefydliad. Mae’r ymweliad wedi bod yn hynod werth chweil, gan roi cyfle i arddangos ein cyfleusterau o’r radd flaenaf a chyfnewid canfyddiadau gwerthfawr. Rydym yn edrych ymlaen at weithio’n agos gyda Belron® i hyrwyddo technoleg gwydr modurol a safonau diogelwch. Hoffem ddiolch hefyd i’r Athro Chris Davies a Dr Gwen Daniel yn Belron® am eu cefnogaeth barhaus.” Mae’r Athro Chris Davies, Pennaeth Ymchwil Technegol ac Arloesi yn Belron®, yn Athro Ymarfer yn Y Drindod Dewi Sant a Dr Gwen Daniel yw Pennaeth Ymchwil Dechnegol.
Mae’r ymdrechion cydweithredol rhwng Y Drindod Dewi Sant a Belron® yn tanlinellu ymrwymiad i hyrwyddo technoleg gwydr modurol a safonau diogelwch. Trwy ysgogi cyfleusterau ymchwil ac arbenigedd blaengar, mae’r ddau endid yn parhau i yrru arloesedd yn y maes, gan fod o fudd i ddefnyddwyr ledled y byd yn y pen draw.
Gwybodaeth Bellach
Arwel Lloyd
Prif Swyddog Cyfathrebu a Chysylltiadau Cyhoeddus
Cyfathrebu Corfforaethol a Chysylltiadau Cyhoeddus
E-bost: arwel.lloyd@pcydds.ac.uk
Ffôn: 07384 467076